អត្ថបទកំណាព្យ

 ពុកថា.........ម៉ែថា...............‌!

         ម៉ែថា ត្រូវត្រាប់សត្វត្រដេវវ៉ិច                ដេកមិនភ្លឹកភ្លេចស្មារតីប្រយ័ត្ន

ពុកថា រៀនធម៌កុំសូត្រតែមាត់                ប្រឹងប្រតិបត្តិផងទើបយល់បាន។

ម៉ែថា ស្ទឹងដប់មិនស្កប់ទន្លេ                    ច្បាប់គ្រូល្អទេកុំប៉ងបំពាន

ពុកថា ចង់សុខស្រណុកស្ងប់ក្សាន្ត        ត្រូវប្រឹងឱ្យបានចិត្តសមាធិ។

ម៉ែថាចង់ចេះសម្លាប់អាចារ្យត្រូវចាំតម្រា សុ.ចិ.បុ.លិ.^{( ១ )}

ពុកថា ចង់មានសម្មាទិដ្ឋិ             ត្រូវលះ អស្មិ ប្រកាន់ មានះ ។

ម៉ែថា ធ្វើល្អកេរ្តិ៍គង់ពាន់ឆ្នាំ       តែធ្វើបាបកម្មនាំទុក្ខក្រៃក្រាស់

ពុកថា បើស្អប់ច្រើនជំពប់ប៉ះ     មិនស្ដាប់ពាក្យចាស់ច្បាស់ជាចំបែង  ។

ម៉ែថា កុំដេកដូចជាសត្វជ្រឹង                    ស្អុយឆ្អេះទ្រហឹងនោមស្រោចខ្លួនឯង

ពុកថា គីង្គក់កុំលក់ថ្នាំស្រែង                      កុំអួតក្ដែងៗក្រែងចេះគេផង                    ។

ម៉ែថា ចេះដប់ចាញ់ប្រសប់មួយ               កុំចេះតែព្រួយគិតតែបន់ផ្សង

ពុកថា ពាក្យចាស់មានច្រើនកន្លង            ពិចារណ៍ច្រើនដងទើបយល់ន័យបាន៕

                        ពន្យល់ពាក្យ ៖ សុ = សុត “ស្ដាប់”,  ចិ= ចិន្ត “គិត”,  បុ= បុច្ឆ “សួរ”,

                                   លិ= លិខ “សរសេរ, កត់, ចម្លង”, ជា​អង្គ​របស់​អ្នក​រៀន  ។

​​                                                                                                                        ដោយៈឧបាសក ហ៊ិម ឆាន់